O conselleiro do Medio Rural en funcións, José González, acompañado por alcalde de Sober, Luís Fernández, e o presidente do Consello Regulador da DO Ribeira Sacra, Antonio Lombardía, realizou este sábado un percorrido pola XLIV Feira do Viño de Amandi, que se celebra durante esta fin de semana no concello lucense.
Previamente, José González saudou, no Pazo de Sober, aos membros do xurado de catas desta edición da festa, que conta coa participación dunha vintena de adegas.
Na visita, o titular do Medio Rural remarcou a calidade diferencial dos viños desta subzona da denominación de orixe (DO) Ribeira Sacra e reiterou o apoio da Xunta ao fomento, reforzo da competitividade e promoción do sector vitivinícola da nosa comunidade, cunhas liñas específicas dotadas con máis de 40 millóns de euros no período 2018-2023.
