Segundo o BNG, este feito, “por si só, demostra a absoluta falta de planificación do goberno municipal”, primeiro invístese diñeiro en pintar e sinalizar a vía e, poucos meses despois, decídese levantar todo para volver empezar.

Aseguran que a obra, aínda que executada rapidamente, “xerou molestias totalmente innecesarias ao tránsito e ao comercio da zona, sen achegar ningunha mellora substancial á mobilidade nin á vida diaria da veciñanza. O resultado final limítase a substituír un firme que funcionaba por outro novo, pero igual”. Para o BNG, isto é unha mostra evidente dun modelo de gobernar que responde máis á necesidade de aparentar actividade que a unha análise séria e rigorosa das necesidades de Monforte.

Resulta especialmente grave que se invistan 100.000 euros en “arranxar o que non estaba roto”, mentres existen en Monforte demandas e necesidades reais que continúan sen atender. O BNG enuncia: Beirarrúas estreitas ou deterioradas, cableado aéreo que impacta negativamente na estética urbana, iluminación insuficiente en diversas rúas e barrios ou espazos públicos degradados que precisan recuperación. “Estas son as actuacións que mellorarían de verdade a accesibilidade, a seguridade e a calidade de vida da cidadanía”, afirman.

“Gastar 100.000 euros nun asfaltado innecesario é un despropósito. Os recursos públicos deben empregarse para resolver problemas reais, non para facer obras que só buscan aparentar movemento. Monforte merece unha xestión seria, planificada e pensada para a veciñanza”, conclúe o concelleiro do BNG, Manuel Luaces.