O autor de relatos e obras de teatro como “O que non che contaron de Monforte”, “De Nápoles a Monforte polo Inferno”, “Contáronme que che contara”, “Dulcinea de Lemos” e a novela “Soños de Chicolate”, atrévese nesta ocasión coa poesía. A súa nova creación literaria leva por título “A vida nas botas”, no que el mesmo define como “follas encadernadas que xogan a ser poesía”.
O autor tamén nos advirte no comezo do libro de varias cousas: de que “é perigoso escribir poesía”, porque podes morrer no intento, e de que a poesía é “un xénero que non ten termo medio, ou abráiate ou rexéitate”.
Refírese tamén a este novo libro de Antón Valcarce o seu homónimo Antón Vidal, profesor do IES Daviña Rey, dicindo nun arremedo de prólogo “Antón sorpréndenos con cada nova publicación que entrega. Con todo, vindo dun cantautor un libro de poemas non nos deberá coller desprevidos. É máis, ao ler moitos deles un case sempre ten a sensación de que está ante cancións ás que só lles falta unha melodía”.
O libro está editado por Peruchela, nunha nova liña de acción cultural que emprende dende a Librería Pelayo, e a presentación poderase ver en pequenas pílulas de vídeo a partir das 18:00 h. do sábado 14 de novembro na páxina de Facebook e na canle de Youtube.
