Dende a mañá do pasado sábado 16 de xuño xa se pode desfrutar dos tradicionais paseos en barca polo río Cabe. Durante os meses de xuño, xullo, agosto e setembro poderase realizar unha travesía por este enclave do concello de Monforte de Lemos.

O organismo encargado de xestionar esta actividade é o Clube de Montaña e Piragüismo Quixós, que se ocupa do mantemento das barcas e o cobro e atención aos pasaxeiros. O prezo desta ruta é de 3,25 euros, coma en anos anteriores, e só se permite un máximo de seis persoas en cada barca. Os paseos parten do embarcadoiro do Parque dos Condes e poderán facerse de luns a venres entre as 18:00 e as 22:00 e as fins de semana tamén en horario de mañá de 11:00 a 14:00.

Esta actividade inaugurouse despois de diversos traballos de adecentamento do entorno do Parque dos Condes e o río Cabe, e para o alcalde de Monforte, José Tomé, estas travesías “permiten gozar dunha perspectiva diferente da nosa cidade e que soamente é posible ter dende o río”.