O titular de Cultura e Educación subliñou que esta importante achega, sumada á declaración BIC “garante o futuro dun inmoble clave para a paisaxe cultural da Ribeira Sacra e para comprender a historia deste municipio e o desenvolvemento do Renacemento en Galicia”. Neste senso, o conselleiro puxo en valor “o importante compromiso da Xunta de Galicia coa protección e posta en valor do patrimonio cultural de toda a Comunidade, e especialmente da Ribeira Sacra, onde estamos investindo 4,5 M€ en actuacións como a que poremos en marcha en Monforte de Lemos”.
Non será o único investimento este ano, pois, como explicou o conselleiro, prevese unha segunda intervención de 75.000 euros para restaurar diferentes bens artísticos do inmoble.
Así pois, estas actuacións de recuperación patrimonial “van engalanar a capital da Ribeira Sacra de cara a recta final para a posible declaración deste enclave como Patrimonio Mundial pola Unesco”, abondou o conselleiro.
Os traballos de restauración
O proxecto de restauración –financiado ao abeiro do programa operativo FEDER Galicia 2014-2020– permitirá solucionar as afeccións que sufre o inmoble, entre elas as gretas provocadas na igrexa polo célebre terremoto de Lisboa de 1755 que, aínda que non comprometen á estabilidade das bóvedas, é preciso corrixir. As actuacións estenderanse por un prazo máximo de seis meses e resolverán os principais problemas de conservación deste monumento.
Entre as actuacións previstas atópase o selado da greta do muro do presbiterio e a substitución da cuberta de tella da zona do presbiterio, acometendo a consolidación da bóveda. Restaurarase e porase en valor o pasadizo existente tras o presbiterio cunha actuación específica en todos os seus elementos construtivos.
Isto permitirá evitar as filtracións que se están a producir na cuberta do presbiterio e que están a degradar a estrutura da bóveda; arranxar e recuperar o pasadizo que comunica as dúas alas na planta baixa, que se reformou por última vez no ano 1835; reverter a entrada de auga a través das carpinterías do tambor na cúpula, e deter os ataques xilófagos no interior da igrexa que está afectando tanto ao pavimento como a diferentes elementos mobles.
Singularidade da Nosa Señora da Antiga
O Colexio de Nosa Señora da Antiga, tamén coñecido, entre outras denominacións, como Colexio do Cardeal, Colexio da Compañía ou Escolapios, é un dos expoñentes máis significativos da arquitectura do clasicismo herreriano en Galicia. O inmoble amosa dunha forma tan clara e convincente as regras compositivas, formais e decorativas deste estilo que supuxo, en diversas ocasións, a súas adscrición errónea ao propio Juan de Herrera.
Entre os espazos sobranceiros, ademais da excepcional fachada que preside o Campo da Compañía, debe citarse a igrexa e os seus retablos, así como a cúpula que cubre o cruceiro, a escaleira monumental e os seus claustros. Na mesma liña, cómpre destacar tamén a importancia e valor cultural do seu museo e o rico patrimonio moble senlleiro que alberga, no que se poden atopar obras de artistas como El Greco, Andrea del Sarto ou Francisco Pacheco, ou documentos e patrimonio bibliográfico dos séculos XV e XVI relacionados cos mecenas do colexio, a Casa de Lemos e, posteriormente, a de Alba.
