Co gallo do “Día da Muller Rural”, o vindeiro 15 de outubro, o Concello de Monforte organizará, dende a Concellería de Igualdade e en colaboración co Centro de Información á Muller (CIM), un Programa de empoderamento e mellora da empregabilidade dirixido a mulleres e denominado “Mulleres mudando o Rural”. O desenvolvemento formativo desta acción é responsabilidade da Asociación Sustinea, asociación con sede en Ourense que está especializada en temas de sostenibilidade. Neste programa abordará o empoderamento da muller como aspecto fundamental da súa propia evolución e da dinamización do rural.
O Programa ten unha duración de 20 horas distribuídas en 5 sesións de catro horas en horario de 9:30 h a 13:30 h que se levarán a cabo no Centro Cívico Social (paseo do Malecón, 26) nas seguintes datas:
Venres 13 de setembro: Obradoiro de Crecemento Persoal: Autocoñecemento e autoestima.
Xoves 10 de outubro: Obradoiro de Apoderamento: Orientación sociolaboral, recursos e entrevistas.
Xoves 17 de outubro: Obradoiro de Apoderamento: Orientación sociolaboral, recursos e entrevistas II.
Xoves 21 de novembro: Obradoiro de Ferramentas para a vida: Recursos sociais, xurídicos e dixitais.
Mércores 4 de decembro: Obradoiro “Mulleres Natura”: A figura da muller na emerxencia climática e no desenvolvemento rural.
O obxectivo das diferentes sesións formativas é aumentar a participación social e laboral das mulleres do ámbito rural a través da mellora da súa capacitación profesional. En canto á financiación, esta corre a cargo da Consellería de Política Social da Xunta de Galicia e conta co apoio do Concello de Monforte.
As mulleres interesadas en participar na actividade deben inscribirse no Centro de Información á Muller sito no Centro Cívico Social ou ben chamando ao número 982 416 350.
