O Presidente da Deputación en funcións, Darío Campos Conde, informou que a Xunta de Goberno do venres resolveu a favor de novas contratacións para traballar en colectivos da provincia que realizan labores de asistencia social. A acción farase efectiva a través do programa “Tecendo Emprego” e 45 serán os desempregados retomarán a actividade laboral.
As preferencias para a contratación céntranse en colectivos con dificultades para seren contratados, de xeito que o 50% serán mozos/as de entre 18 e 35 anos sen experiencia laboral previa; o 40% lucenses de entre 30 e 50 anos e o 10% maiores de 50 anos. En canto aos perfís que se buscan para cubrir as necesidades dos colectivos sociais nos que van traballar son: terapeutas ocupacionais, educadores/as sociais, traballadores/as sociais, técnicos/as de orientación laboral, psicólogos/as, mestres, responsables de programas de inserción laboral; así como administrativos/as, guías de museo e mesmo peóns.
Campos Conde explicou que “dotamos a este plan de 1 millón de euros para asumir todos os custos laborais destes novos traballadores durante un ano con axudas de entre 18.000 e 24.000 euros. Trátase dun plan que xera emprego directo na provincia, favorecendo ás persoas con máis dificultades á hora de atopar traballo, ao tempo que contribúe ao desenvolvemento dos proxectos dos colectivos sociais da nosa provincia”.
Entre os colectivos nos que traballarán os novos contratados/as encóntranse algúns do sur de Lugo como por exemplo: AGORA, asociación monfortina que defende os dereitos de persoas con discapacidade, ou a Fundación Uxío Novo Neira de Folgoso do Courel.
