Unha ruta a pé de 12,65 quilómetros para a que se habilitan 60 prazas. O xoves, 1 de outubro, ás 12:00 horas, remata o prazo para inscribirse a través deste formulario. O envío da solicitude non confirma a praza. A organización chamará a cada solicitante para confirmar a dispoñibilidade e, de ser o caso, o horario de recollida.

A andaina comezará ás 10:00 horas no Barco. A xornada inclúe unha visita ás Covas de Vilamartín de Valdeorras, petiscos e degustación. Tamén están incluídos o transporte en autobús, o acompañamento dun técnico de montaña e de guías, e o seguro.

Para facilitar a participación, un autobús sairá de Lalín ás 08:00 horas e recollerá despois en Chantada e no Barco. Outro sairá á mesma hora de Pantón e pasará por Monforte antes de chegar ao inicio da ruta. A organización comunicará por teléfono a hora concreta das paradas posteriores. Os autobuses de regreso sairán ás 16:00 horas de Vilamartín de Valdeorras: un dirixirase ao Barco, Chantada e Lalín, e o outro a Monforte e Pantón. Quen se desprace polos seus propios medios deberá prever a volta, xa que só poderá utilizar o autobús se quedan prazas libres.

O programa de rutas continuará en outubro e novembro. A seguinte saída será o 17 de outubro cunha ruta entre Pantón e Belesar e unha visita ao Mosteiro do Divino Salvador de Ferreira de Pantón. A terceira xornada está prevista para o 7 de novembro, cunha andaina entre Bandeira e Ponte Ulla e unha visita ao Pazo de Oca.