Esta colaboración económica destínase a sufragar gastos correntes de xestión e de actividade do museo, “enmárcase no firme compromiso que a Deputación ten coa difusión e a posta en valor da nosa cultura, a historia e o patrimonio, tanto material como inmaterial, e aproveitar toda esa riqueza para impulsar a economía, o sector hostaleiro, o comercio e o turismo”.

O MUFERGA foi inaugurado no ano 2001 e está xestionado pola Fundación dos Ferrocarrís de Galicia, da que é patroa a Deputación de Lugo. Nel desenvólvense proxectos para a exhibición pública do parque móbil ferroviario cun alto valor e interese turístico e cultural, “tanto as instalacións como o propio material que atesoura convérteno nun dos museos vivos máis importantes do país, visitado anualmente por multitude de turistas nacionais e internacionais”, indica o mandatario provincial. Entre as súas actividades destacan as visitas guiadas e o percorrido que se realiza polo complexo nun tren de pequenas dimensións, dous atractivos que son moi apreciados polos visitantes.

“O museo dispón dun gran potencial para dinamizar o noso turismo, a nosa cultura e a vida social de Monforte e da provincia, e debemos velo como unha excelente oportunidade para continuar avanzando para posicionarnos como un destino turístico estrela fóra dos meses estivais”, afirma o Presidente.