Segundo a CIG Saúde, dos 6 médicos do centro de saúde de Chantada, a semana pasada faltaron 3 que non foron susbtituidos e nesta semana 1 máis, tamén sen substituto. Nesta situación o SERGAS alega que non hai médicos substitutos, pero din desde a CIG que teñen fontes que aseguran que iso no é certo. O resultado, que as consultas en Chantada están desbordadas, situación que a CIG califica de insostible. E apuntan, “O SERGAS non para de bombardear nos medios as “bondades” do novo modelo de atención primaria e como podemos ver en Chantada están “aplicándoo moi ben””.
O sindicato asegura que a situación se agrava con que no Centro de Saúde non hai pediatra nin odontóloga e o cupo pediátrico de 800 nenos está sendo atendido polos dous médicos de familia que hai no centro de saúde. Segundo a CIG, “Este novo modelo de atención primaria é unha cortina de fume que non está a solucionar os problemas graves que están a pasar os centros de saúde e os Pacs”. Engaden que o modelo desperta malestar entre os seus profesionais. A este respecto está convocada unha folga de Atención Primaria para os días 9, 10 e 11 de abril.
A CIG tamén denuncia a desidia do EOXI por non ter dado resposta ás demandas dos traballadores do centro de saúde de Chantada e solicitan que se cubran as ausencias e baixas, crear un novo equipo no PAC de Chantada para saídas a domicilios, cobertura da pediatra e que xerencia do EOXI dea solución ao escrito sobre as deficiencias do centro.
