José Tomé terá un cómodo goberno en Monforte nos vindeiros catro anos. O rexedor socialista acadou 11 dos 17 concelleiros ao duplicar case, os seus seis concelleiros de 2015.

A suba espectacular de Tomé é a costa dun BNG que se esfarela e cae de cinco a un concelleiros. Tamén baixan os populares que perden un edil e máis de 700 votos. No consistorio tamén estará Esperta Monforte, cun edil.

Os socialistas recibiron o apoio de 5.373 votantes, o 55,60% do escrutinio. “Hoxe é un día histórico para vós, socialistas de Monforte”, dicía na noite deste domingo o rexedor monfortino.