Galicia é a segunda comunidade na que máis baixou o paro no pasado mes de maio con respecto ao pasado ano. Ademais, a caída do desemprego supera con máis de tres puntos e medio de diferenza a media que rexistrou o Estado. A baixada en Galicia foi do -8,99% fronte ao -5,31% de España.
No que respecta ao sur de Lugo, segundo comenta o sindicato CC.OO., o descenso do paro foi xeneralizado nas catro comarcas. O paro acumulado neste territorio, tras rematar maio, é de 3.359 persoas co balance de 198 desempregados menos.
Por comarcas, Lemos lidera a contratación de maio cun total de 85 persoas. O paro acumulado queda agora en 1.516 persoas. Sarria, un mes máis, perde tamén parados, nesta ocasión 65 persoas e queda con 1.044 anotados/as nas oficinas do INEM.
Chantada perde 28 desempregados, suma agora un total de 591, e Quiroga baixa en 20 o número de parados, quedando 208 pendentes de futuras ofertas laborais.
Dende a secretaría de acción sindical de CC.OO. Lugo valoran con gran satisfacción os datos de maio pola baixada xeneralizada en todos os concellos, “algo que non acontecía dende o comezo da crise”, comentan.
Aínda así, dende o sindicato cren necesario que concellos como Monforte de Lemos, con máis de 1.059 parados/as, un 44,5% do total das comarcas de Chantada, Lemos e Quiroga xuntas, debería pensar na creación dunha concellería de emprego tendo en conta ademais a alta porcentaxe de paro de mozos/as e maiores de 52 anos.
Tamén lembran que nas comarcas de Lemos, Quiroga e Chantada hai preto de 1.000 persoas que non cobran ningunha axuda.