A partir do día 11 de xuño a Casa da Cultura de Sober acollerá a mostra fotográfica Je Ne Baise Plus. Trátase dunha colección de nove fotografías de Iván Merayo acompañadas con textos de Eva F. Ferreira. O obxectivo da exposición é concienciar sobre a problemática da violencia de xénero, mostrando a desigualdade e os estereotipos de xénero para xerar un cambio de pensamento.
Os autores resaltan que as imaxes presentes nesta serie non presentan directamente escenas de maltrato, senón que aluden esta lacra de forma simbólica. Tamén habilitarán un espazo denominado Baúl dos Pensamentos, onde calquera persoa poderá deixar as súas opinións e experiencias de forma anónima.
A inauguración oficial da mostra será o día 11 de xuño ás 20:30, e permanecerá aberta ata o 25 de xuño. Aqueles que o desexen poderán visitala dende as 9:00 ás 14:00 e de 16:00 a 20:00 de luns a venres; e os sábados de 11:00 a 13:00. Esta actividade forma parte dun ciclo para concienciar contra a violencia de xénero programado polo Concello de Sober en colaboración coa asociación FEMforte.
