Dende o luns día 10 xa é posible matricularse no VII Obradoiro de verán de música e baile do Concello de Monforte. Estas actividades terán lugar entre o 19 e o 23 de agosto no Conservatorio Municipal Mestre Ibáñez e están dirixidas a persoas de todas as idades.
Os obradoiros abranguen tres ramas diferenciadas. A primeira, que se corresponde coa música, contará con obradoiros de práctica instrumental de especialidades como a guitarra, o violín, o piano, a gaita, a percusión moderna e a flauta. A segunda corresponderase cun obradoiro específico de música e movemento para rapaces de entre 5 e 9 anos. Por último, haberá unha parte adicada á danza para rapaces e mozos en xeral, que poderán escoller entre danza tradicional, danza moderna e ballet clásico.
Os interesados poderán inscribirse do 10 de xuño ao 5 de xullo na secretaría do Conservatorio Municipal ou do 1 ao 17 de agosto no edificio do concello. O prezo será de 25 euros e inclúe ata un máximo de tres obradoiros.
