Segundo sinalan estas dúas asociacións nun comunicado, o presunto autor do disparo fuxiría a un país estranxeiro que se sospeita podería ser Rusia. Dada a circunstancia da fuxida, reclaman que o xulgado ao que remitiron dilixencias, o Servizo de Protección da Natureza (Seprona) e a Xunta, empreguen a ferramenta da “busca e captura”.
Libera e Fundación Franz Weber aseguran que “a gravidade” deste caso, no que se fixo uso dunha arma de fogo e rematou coa intervención veterinaria e a eutanasia do can, “son motivos suficientes” para interpelar a outros estados para atopar ao autor dos feitos.
Os colectivos animalistas indican que podería tratarse, “probablemente da primeira” orde deste tipo para un sospeitoso de dar morte a un animal e suxiren que debería ser unha práctica xudicial “máis habitual”. Lembran, que os malos tratos animais é un delito contemplado no Código penal e que aplicar a busca e captura pode ser de gran utilidade “para evitar que a impunidade destes sucesos acaben favorecendo a súa repetición”.
