A Consellería de Cultura e Turismo vén de publicar o 18 de xullo a resolución pola que se incoa o procedemento para declarar Ben de Interese Cultural (BIC) o colexio da Nosa Señora da Antiga, situada na Praza Campo da Compañía de Monforte de Lemos. A partir desa decisión, aplícase de forma inmediata e provisional o réxime de protección que establece a Lei do Patrimonio Cultural de Galicia para os bens de interese cultural.

Esta decisión, tomada a partir dos informes elaborados pola Dirección Xeral de Patrimonio Cultural, a Real Academia Galega de Belas Artes e o Consello da Cultura Galega, está fundamentada en dous aspectos básicos. Dunha banda, destacan a importancia deste edificio para o desenvolvemento do Renacemento en Galicia e para a historia da Vila de Monforte. Doutra banda, destacan o notable rol do mecenado eclesiástico e que o colexio segue a cumprir a mesma función, o ensino.

A historia do Colexio da Nosa Señora da Antiga comezou a finais do século XVI, o cardeal de Sevilla don Rodrigo de Castro ordenou a súa construción. A súa intención era a de crear unha institución filantrópica na súa cidade natal e doerlle a súa colección artística e bibliográfica. Dende entón, houbo momentos nos que esta construción vivíu etapas de decadencia: despois dos danos do terremoto de Lisboa (1755), coa expulsión dos Xesuítas (1767), logo dos saqueos das tropas francesas (1809) e cun gran incendio en 1824.