O pasado sábado día 20 caducaba o permiso da empresa Cecosa Varios S.L. para utilizar a marca “O Caurel” nos seus produtos cárnicos e, ao non terse presentado ningún recurso en contra do seu uso por parte desta corporación, esta renovouse. Isto produciuse a pesar das protestas de C@urel Vivo, que pedía a nulidade da concesión por incumprir diversos artigos da Lei de Etiquetado e da Lei de Marcas.
Óscar Carrete, voceiro de C@urel Vivo, denunciaba a total pasividade do Concello ante este asunto. “A nosa alcaldesa está a cobrar adicación exclusiva do Courel para defender os nosos intereses, pero iso non se ve neste asunto”, declaraba Carrete. O líder desta formación engadiu, ademais, que os Populares do Courel só están “pendentes da Deputación”.
Dende C@urel Vivo afirman que presentarán un recurso de alzada e pedirán a anulación da renovación. Así, tamén piden que o Concello ou algunha asociación de empresarios da Serra reclame a súa cesión para poder facer uso dela.
