Os casos de violencia de xénero que se están sucedendo estas semanas ten que obrigar ás autoridades competentes a non baixar a garda e a reforzar aínda máis a protección e atención ás vítimas.

Segundo indican dende ASOCIM -Asociación de Profesionais dos CIM de Galicia-, durante a época estival obsérvase un preocupante aumento dos crimes machistas. Nos meses de xuño, xullo e agosto de 2016, 2017 e 2018, un total de 40 mulleres foron asasinadas polas súas parellas ou exparellas, segundo recollen as estatísticas da Delegación do Goberno para a Violencia Machista. No que vai de ano xa son 35 as mulleres asasinadas por violencia de xénero.

A que se debe este aumento? Segundo Miguel Lorente, exdelegado do Goberno para a Violencia de Xénero, varios factores inflúen no incremento de asasinatos machistas no verán, causas que facilmente poden darse noutras épocas do ano como o Nadal. Llorente destaca que o descenso do ritmo laboral ou o cese da actividade mesma pode levar a que vítima e agresor pasen máis tempo xuntas e, polo tanto, a que a violencia que se viña exercendo ata ese momento aumente, así como os conflitos vencellados á convivencia con outros membros da familia. No caso das exparellas, as rutinas vense suspendidas polas vacacións algo que o maltratador pode interpretar como perda de control sobre a vítima levándoo a reforzar máis a presión e o control.

Diante do terrible aumento de feminicidios durante estes meses, ASOCIM reclama o reforzo de todos aqueles servizos dirixidos á atención e protección das mulleres.

En Galicia contamos con máis de oitenta CIM -Centros de Información á Muller- que son espazos de referencia nos que as mulleres poden atopar asesoramento e acompañamento grazas ao seu persoal, especializado e multidisciplinar, que abordará as súas necesidades desde a intervención social, a axuda psicolóxica e a orientación xudicial.