A Librería Agrasar, en Monforte, acollerá o vindeiro 9 de agosto ás 20:30 h. a presentación do libro El viajero emocional, de Carlos Villarrubia. Neste acto acompañarano a bailarina e coreógrafa Andrea Jiménez e a fotógrafa e divulgadora do rural, Rocío Peruchela.

O autor, Carlos Villarrubia, é escritor, compositor, guionista e xornalista. Aínda que naceu en Barcelona, a súa nai é natural da aldea de Piño, próxima a Monforte. Como letrista, ten composto letras para músicos como Lucrecia, Cómplices, Miguel Ríos ou Martirio, e os seus textos teñen sido interpretados por Lucía Bosé, Paco Valladares ou Silvia Marzo.

En El viajero emocional trata a enerxía afectiva e compila diversos textos para radio e televisión, poemas e cancións, entre outros. Nesta obra adquire moita importancia Galicia e, en particular, a Ribeira Sacra, que está moi presente en todo o libro.