O alcalde, Luis Fernández Guitián, destaca o impulso que a candidatura a Patrimonio Mundial lle está dando ao número de turistas que veñen coñecer Sober e o conxunto da Ribeira Sacra, e repara tamén na importancia para seguir aumentando as visitas que a localidade vaia sumando novos establecementos hoteleiros e novas aperturas no ámbito da hostalería e da restauración.

Nos meses de xuño e xullo recibíronse 1.207 visitantes na Oficina de Turismo da localidade, fronte ás 832 que se achegaron nos mesmos meses do ano pasado. Isto supón un incremento de 45,07% con respecto ao 2018.

Preto de 1.000 persoas foron nacionais do estado español e, respecto ás visitas que chegaron do estranxeiro, un total de 85 persoas, as procedencias foron diversas: EEUU, Uruguai, Venezuela, Arxentina, México ou Xerusalén. Entre os turistas europeos figuran diferentes nacionalidades, como Portugal, Francia, Suíza, Inglaterra, Escocia, Alemaña, Holanda, Polonia, Suecia, Hungría, Eslovenia, Bélxica, República Checa e Italia.

A información máis demandada está relacionada cos miradoiros, embarcadoiros, o románico, as bodegas da zona, a olería, os catamaráns, a hostalería e hospedaxe, así como as rutas pola Ribeira Sacra.