A Consellería de Economía, Emprego e Industria investiu 316.000 euros nesta acción formativa, centrada nas especialidades de Atención sociosanitaria a persoas dependentes en institucións sociais -con 4 alumnos en cada concello- e Montaxe e instalación de construcións de madeira -3 alumnos en Pantón, outros tantos no Saviñao e dous en Sober-.

O obxectivo prioritario dos obradoiros é mellorar a empregabilidade dos participantes coa adquisición de habilidades teóricas e prácticas en áreas con boas perspectivas de integración no mercado de traballo. Neste sentido, os alumnos realizaron traballos acordes coa especialidade elixida, 12 deles atendendo ao coidado de persoas maiores nunha residencia e o resto construíndo elementos de madeira nos distintos concellos.

Así, o obradoiro fabricou e instalou mobiliario, ademais de acondicionar o xa existente, nas rúas, espazos e edificios públicos dos tres concellos. Entre os elementos elaborados figuran papeleiras, mesas, bancos, marquesiñas, varandas, contraventás, portas, armarios ou estantes.