O Círculo Saviñao de Escairón vén de inaugurar unha “heteroxénea” exposición con obras
dos alumnos e alumnas das clases de pintura do pintor arxentino afincado na Ribeira Sacra, Alejandro Ciurluini, e tamén unha pequena mostra da súa propia obra.

Como detalle peculiar, os autores desta mostra teñen entre 10 e 70 anos, feito que lle dá á exposición unha atractiva singularidade.

Enrique Sampil, presidente da sociedade cultural de referencia no Concello do Saviñao, aproveitou a inauguración para darlles ánimos a todos e todas os alumnos/as e pedirlles que sigan practicando e adquirindo a necesaria técnica que lles permita expresar toda a súa creatividade no futuro.

A mostra estará aberta ó público no local social ata o vindeiro 15 de setembro.