O CCU de Monforte quere coñecer as demandas da veciñanza para ofrecer o que a xente necesita do comercio local. Nos próximos días contarase na páxina web do CCU cunha enquisa sobre hábitos de consumo e demandas respecto do comercio local. Esta enquisa tamén a entregarán os comercios asociados aos clientes, para con eses datos coñecer que deben facer para ofrecer aos veciños o que demandan na súa relación co comercio local.

Na xornada do 7 de setembro, as inquedanzas do sector levararanse á rúa a través de performances nos establecementos para escenificar as preocupacións ás que se enfronta o comercio local.

Na segunda semana de setembro a campaña de sensibilización continuará con vinilos informativos que se colocarán nas princiais rúas comerciais da cidade e flyers que entregarán nos comercios explicando o que supón que os veciños e veciñas compren nos comercios locais e o que supón que non o fagan.

“Se mercamos no comercio local todos axudamos a dinamizar a economía da cidade e contribuimos a mellorar o lugar no que vivimos. Se non mercamos no comercio local condenámolo a desaparecer, condenámolo a morrer”, din desde o CCU. O día 19 de setembro ás 20.30 na Praza de España lerase un manifesto afondando na filosofía coa que naceu o CCU, seguida de funeral para rematar nun panexírico no que insistir en que o comercio local é un bo veciño para Monforte que non debemos deixar morrer.

Convídase aos comercios e establecementos de Monforte e a todos os veciños, a participar desta convocatoria que percorrerá varias rúas do centro da cidade para rematar novamente na Praza de España coa lectura do panexírico do comercio local.

Desde o CCU aaseguran que “Necesitamos rexurdir o comercio local e contribuír a facer da nosa cidade un lugar mellor, co dinamismo económico que a ten caracterizado. Con esta campaña queremos chegar a todos os veciños, por iso dedicimos comezar na rúa e na relación directa coa cidadanía e toda esa experiencia grabala en vídeo e fotografiala para distribuila a través de internet, durante as próximas semanas.”