O Grupo do BNG de Sarria ven de presentar ó que será o  seu candidato á alcaldía nas eleccións municipais 2019, Efrén Castro.

O candidato, que estivo acompañado por militantes e simpatizantes do BNG e da Parlamentaria Olalla Rodil,agradeceu o traballo e o apoio recibido durante todo este mandato por toda a organización e especialmente referiuse a Mónica López “como a mellor compañeira posible nas tarefas de goberno e como integrante da corporación municipal”.

Efrén Castro adiantou na súa presentación que, “imos a por todas xa que o BNG demostrou que somos o único proxecto político serio para Sarria. Aspiramos a multiplicar a representación do BNG para que Sarria poida avanzar no século XXI como outras vilas e cidades nas que xa goberna o BNG” e referencia á evolución de concellos como Pontevedra, Ribadeo, Allariz ou Muras.

O actual Tenente-Alcalde e voceiro do BNG no concello puxo en valor todas as iniciativas postas en marcha polo BNG dende o goberno municipal e fixo fincapé “Sarria merece un goberno de progreso que lle dea estabilidade ó concello e seriedade á política municipal e para iso imos traballar”.

Finalmente, Ollala Rodil salientou o traballo feito dende a Concellería de Igualdade e Cultura pola edil Mónica López que “conseguiu colocar a Sarria no panorama cultural galego e puxo en marcha proxectos en materia de igualdade que xa son exemplo para outras moitas cidades e vilas galegas”.