Segundo o Partido Popular de Monforte, a estrada LU-P-3202, de Monforte a Currelos (LU-611), no tramo correspondente ao municipio de Monforte é “unha das que levan moito tempo esquecidas pola Deputación, da que dependen”.
En opinión da portavoz do grupo municipal popular, Katy Varela, as queixas dos veciños/as son continuas, «e están máis que xustificadas» motivo dabondo para que a citada representante do PP anuncie unha iniciativa plenaria para instar á Deputación a executar as obras precisas para mellorar esa estrada.
Varela explica que a vía LU-P-3202 ten moitos tramos e, ao seu paso polo municipio de Monforte, o estado é moi deficiente, de tal xeito que “constitúe un risco para o tráfico rodado”. E engade que esta vía provincial necesita con urxencia labores de desbroce da maleza que medra moi abundante nas beiras. De feito, hai sinais que apenas se ven por causa das matogueiras.
A popular confía en que o alcalde de Monforte, José Tomé, atenda a solicitude do PP, unha demanda “que se corresponde cos desexos dos veciños”, e “se convenza a si mesmo, como presidente da Deputación, da necesidade de mellorar sen demora e canto antes a LU-P-3202”.
