Un ano máis os viños tintos da Denominación de Orixe Ribeira Sacra foron os mellor valorados polo panel de cata que conforman membros da Asociación de Euskadi de Sumilleres – Euskadiko Sumillerren Elkartea. A D.O. Ribeira Sacra presentaba a esta cata 14 mostras pertencentes a 9 adegas e recibiron hoxe o seu recoñecemento: Capador, Mencía barrica de 2017 de Adega Tear,primeiro clasificado e Casa Moreiras, Mencía 2018 de Adega Casa Moreiras, como terceiro casificado.
Do acto de entrega de premios participaron o organizador das catas-concurso, o taboadés, José David Fidalgo e o Presidente do C.R.D.O.R.S., José Manuel Rodríguez. José David Fidalgo destacou na súa intervención o esforzo da Irmandadedous Centros Galegos en Euskadi por promocionar os produtos galegos e, en particular, os viños galegos “con esta cata-concurso na que os viños da D.O. Ribeira Sacra sempre obteñen premios. Cada ano os viños desta Denominación son máis coñecidos e recoñecidos”.
Pola súa banda, José Manuel Rodríguez, felicitou aos premiados e agradeceu o traballo de todas as adegas que presentan os seus viños a concursos, certames e feiras “obtendo excelentes resultados e facendo posible que os viños da D.O. Ribeira Sacra sexan coñecidos en todo o mundo”.
