O delegado territorial da Xunta en Lugo, José Manuel Balseiro, mantivo xuntanza cos representantes de todos os concellos promotores co obxectivo de coordinar as actuacións encamiñadas á contratación do persoal. Nesta provincia, desenvolveranse 14 talleres que empregarán a 333 persoas: 272 alumnos-traballadores e 61 máis para as funcións de docencia, dirección e administración.
Na Zona Sur, fináncianse con 1M€ un total de tres iniciativas nas que participan 7 concellos e que xerarán 73 contratos -‘Ricra III’, ‘Sillor VI’ e o obradoiro de Monforte de Lemos. Pola súa banda, na Montaña terá lugar o obradoiro ‘Vía Künig I’ -que comparten tres concellos-; Sarria promove individualmente ‘Sarria: Camiño de Santiago’ e o concello do Páramo impulsa con O Corgo e Guntín o taller ‘Ponte de Areas III’
O procedemento de escolla do alumnado-traballador terá dúas fases: en primeiro lugar farase a selección polas oficinas de emprego e a continuación por un grupo de traballo mixto integrado por Xunta e concellos. Cada obradoiro fará públicas as bases reguladoras do proceso de selección nas propias oficinas de emprego e nos taboleiros de anuncios e páxinas web dos concellos promotores.
Terán preferencia para formar parte do alumnado aquelas persoas que teñan establecido ese tipo medidas no seu itinerario de inserción profesional; mulleres; colectivos en risco de exclusión; persoas que esgotasen as prestación ou subsidios por desemprego; persoas paradas de longa duración; maiores de 45 anos; persoas que carezan de títulos universitarios e de FP de grao superior; persoas con discapacidade e persoas beneficiarias da Risga.
