A Deputación de Lugo retomará o vindeiro luns o programa Referentes Galegas nas Aulas, unha iniciativa que promove conxuntamente coa Asociación de Executivas de Galicia. É unha actividade que naceu da identificación da falta de visibilidade de modelos femininos a seguir nos diferentes ámbitos profesionais e que consiste na celebración de encontros entre alumnos de ESO, FP e Bacharelato da provincia con mulleres referentes de Galicia.

Trátase dunha oportunidade para achegarlle ás novas xeracións diferentes testemuños de mulleres que son referentes, exemplos a seguir nos seus ámbitos profesionais. O programa de encontros retomarase o vindeiro luns, ás 13.15 horas, no IES A Pinguela de Monforte, ao que asistirá a directora técnica na área de servizos e aplicacións do Centro Tecnolóxico de Telecomunicacións de Galicia–Gradiant-, Antía Fernández López, e a formadora e consultora en desenvolvemento do talento, Gloria Santamaría Martínez.

Hai programadas outras seis visitas antes de final de ano en centros de toda a provincia e en total serán 14 encontros aos que asistirán preto de 700 alumnos.