A Consellería de Infraestruturas e Mobilidade publicou este venres no Diario Oficial de Galicia (DOG) a expropiación das leiras necesarias para realizar a conversión do corredor Lugo-Monforte de Lemos, concretamente no tramo A Pobra de San Xiao-Sarria Centro, nunha autovía.
A Xunta de Galicia declara a utilidade pública e a urxente ocupación dos bens e dereitos afectados, nos municipios de Sarria e O Páramo, un total de 53 leiras, cuxo custo para a administración se eleva a 255.000 euros. O levantamento das actas previas á ocupación dos terreos sitúase entre finais deste ano e principios de 2020.
O delegado territorial da Xunta de Galicia, José Manuel Balseiro, lembrou que a Consellería de Infraestruturas e Mobilidade ten prevista a licitación da obra a finais deste ano, para que a execución das mesmas poida comezar a mediados de 2020. O orzamento desta obra ascende a 24,4 millóns de euros.
O último tramo do corredor púxose en servizo en novembro de 2015 e permitiu reducir o tempo de desprazamento entre Lugo e Monforte de Lemos a 45 minutos, grazas a un investimento da Xunta de 135 millóns de euros desde 2009.
