As músicas, Raquel Areal e Karla Martínez, ofrecerán o sábado, 23 de novembro, un concerto de violín e piano en Sober. A actuación, aberta ao público, será ás 19:30 horas na Casa da Cultura e forma parte do ciclo ‘Música no Outono’ organizado polas Xuventudes Musicais e o Concello de Sober.
Programa
- Sonata nº3 de J.Brahms para violín e piano
- Danza española “La vida Breve” de M.de Falla (arranxo de F.Kreisler)
- Romanzas de Clara Schumann para violín e piano
- ”Melodie” de P.Tchaikovski
- ”Tzigane” de M.Ravel
Raquel Areal, violín
Naceu en Tui no 1999, onde comezou os seus estudos musicais. En 2011 trasladouse a Portugal, onde proseguiu a súa formación en ARTAVE e na Escola Profíssional de Música de Espinho. Desde 2016 é alumna da Escuela Superior de Música Reina Sofía, na Cátedra de Violín Telefónica co profesor Zakhar Bron e Yuri Volguin. Actualmente forma parte do Cuarteto Óscar Esplà de Asisa, tutelado polo profesor Heime Müller, antigo compoñente do Cuarteto Artemis.
Karla Martínez, piano
Nace na Habana-Cuba no 1988. Graduada con Diploma de Oro no Instituto Superior de Arte de Cuba e Máster de Interpretación Musical na Escuela Superior de Música Reina Sofía de Madrid, onde estudou co lexendario pianista e profesor Dimitri Bashkirov e cos prestixiosos mestres Denis Lossev e en música de cámara Marta Gulyas.
Desde o pasado curso é profesora pianista repertorista do Centro Superior de Enseñanzas Superiores Musicales Katarina Gurska en Madrid e recentemente incorporouse tamén como repertorista á Escuela Superior de Música Reina Sofía.
