A clínica veterinaria de Chantada á que foron trasladados os cachorros da cadela asasinada polo seu dono o sábado confirmou que “non presentaban lesións” e que non “sufriron malos tratos”. Así, lembra que a competencia para actuar en casos de animais abandonados “corresponde aos concellos”.
No entanto, a petición do Concello de Chantada, a Xunta supervisou este martes o traslado dos cachorros “a un centro de acollida de animais autorizado” onde se lles rexistrou e inscribiu. Tamén indicaron que, de acordo á normativa aplicable de benestar animal “e tendo en conta que son moi pequenos e requiren moitos coidados, con biberón cada catro horas”, optouse por entregalos “a un fogar de acollida temporal que os está atendendo e conta con supervisión dos servizos veterinarios”.
“Cando sexan máis grandes, poderanse entregar en adopción a distintas familias como se fai habitualmente nos casos de animais abandonados”, apostilaron.
DILIXENCIAS
Por outra banda, o xulgado de Chantada (Lugo) abriu dilixencias polo caso da cadela maltratada neste municipio, segundo confirmaron a Europa Press fontes da Fiscalía Superior de Galicia, que precisaron que o Ministerio Público persoarase como acusación pública na causa.
Tamén a protectora ‘El Refugio’, de Madrid, que precisa, nun comunicado, que o fixo “tras ter coñecemento dos feitos sucedidos na localidade o sábado 30 de novembro”. Outras entidades como Mundo Vivo ou o partido animalista Pacma anunciaron a súa decisión de personarse, así como o Colexio de Veterinarios de Lugo e a Federación de Cazadores.
OS ARGUMENTOS DO HOME
Por outra banda, o atestado da Garda Civil recolle que identificou ao suposto autor dos feitos, “un veciño da localidade” e dúas testemuñas do sucedido o pasado sábado. Ademais, sinala que o home “admite en presenza dos axentes que disparou cunha escopeta ao animal xa que apareceu fai uns quince días na zona e que, ademais, nun alpendre próximo da súa propiedade atopábase unha camada de cachorros”.
En base ao recollido nestas dilixencias, sostén que a Garda Civil interveu ao home “unha escopeta marca Benelli do maleteiro do seu coche“, á vez que se lle trasladou que sería investigado como suposto autor dun delito de malos tratos aos animais.
