A asociación animalista Libera informou de que os deputados de Galicia en Común, Antón Gómez-Reino e Yolanda Díaz, rexistraron unha batería de preguntas no Congreso dos Deputados, dirixida ao Goberno en funcións, en relación co caso de malos tratos animais de Chantada, onde unha cadela foi tiroteada, mallada e atrastrada polo pescozo, para acabar morrendo días despois no hospital Rof Codina.

Libera precisou que ambos os deputados preguntan ao Goberno se tivo coñecemento deste caso, se realizou algún tipo de xestión para denuncialo e se ten pensado adoptar algún tipo de medida “máis aló das reactivas”, como a elaboración dunha Lei Marco de Protección Animal.

A organización animalista reclama “accións contundentes contra o responsable”, pero tamén “as modificacións lexislativas necesarias para previr” sucesos deste tipo.

Tamén se sumaron á iniciativa dos deputados de Galicia en Común, os parlamentarios Juantxo López de Uralde, quen fora director da organización ecoloxista Greenpeace, e Txema Guijarro, secretario xeral do grupo parlamentario de Unidas Podemos e membro da Asociación Parlamentaria pola Defensa dos Animais.