O Concello de Sober estará presente un ano máis con stand propio para promocionar o seu produto máis emblemático, o viño de Amandi, e tamén outros recursos turísticos, como a olería de Gundivós e o seu patrimonio natural e arquitectónico; o Canón do Sil, os miradoiros ou o románico rural, entre outros.

Tamén aproveitará esta cita para publicitar a XL Feira do Viño de Amandi, declarada de Interese Turístico, que se vai celebrar na localidade os días 4 e 5 de abril. O concello terá un día dedicado en Xantar, que será o domingo día 9. Nesta xornada farase unha degustación de viño de Amandi, rosca de Sober e mel, produtos todos eles típicos do municipio.

Xantar

Ademais da promoción da gastronomía, Xantar tense convertido tamén no punto de encontro dos recursos turísticos das rexións participantes no salón. Sen saír do recinto o visitante pode coñecer os atractivos naturais, arquitectónicos, históricos e, por suposto, gastronómicos, dos distintos puntos xeográficos, promovidos por organismos públicos que acoden a esta cita procedentes de España e doutros países a nivel internacional.