O Campionato Galego de Caza do Raposo celebrado este sábado en Sarria rematou con 21 animais abatidos. Un número que é moi superior aos 14 estimados polo presidente da Asociación Galega de Caza. A xornada tamén deparou momentos de tensión entre cazadores e animalistas que acompañaron con pitos e bucinas a algúns dos cazadores o que provocou momentos de tensión.
De feito, non faltaron os insultos nin as persecucións entre os dous colectivos. Os animalistas acusaron aos cazadores de “matar por matar” e os membros dalgunhas cuadrillas denunciaron que foron “acosadas” durante toda a xornada “impedindo que puideran cazar”. A tensión chegou tamén ás portas do restaurante onde os cazadores se xuntaron ao final do campionato. Ata alí acudiu un nutrido grupo de animalistas que deu lectura a un manifesto no que cualifica de “asasinato e crime contra os animais” este tipo de eventos.
TENSIÓN
Desde a madrugada, os afeccionados á caza e animalistas desprazáronse desde distintos puntos de Galicia até chegar a Sarria. A xornada empezou ás nove coa distribución dos 14 grupos de cazadores. Foi entón cando un grupo de animalistas os seguiron en distintos coches até a zona de monte. Algúns, con bucinas e pitos pegáronse aos cazadores impedíndolles cazar o que derivou en momentos de tensión.
A Garda Civil estivo presente durante toda a xornada. Recibiron a chamada de moitas cuadrillas denunciando que “tiñan a animalistas con bucinas pegados ás súas costas, que lles obrigaban a descargar as armas no monte e a desprazarse a outro lugar”. Con todo, algúns cazadores conseguiron despistar a animalistas e realizar a sua actividade sen problemas. De feito, e malia a presión, remataron a xornada con 21 raposos cazados, trece machos e oito femias, máis dos que agardaban.
DIFICULTADES E UNHA DIMISIÓN
Este campionato non está exento de problemas. Inicialmente, íase a celebrar en Monforte a pasada fin de semana, pero suspendeuse porque carecía do permiso necesario da Consellería de Medio Ambiente, entidade que depende da Xunta de Galicia.
Entón, decidiron trasladalo aos montes de Láncara e Triacastela. Con todo, algunhas entidades agrarias mostraron o seu desacordo e lembraron que precisamente nestas zonas hai unha praga de ratas desde hai meses e que é precisamente o raposo o depredador natural dos roedores. Foi tal a tensión que o xefe do servizo provincial de Patrimonio Natural da Consellería de Medio Ambiente presentou a súa dimisión tras non autorizar que se celebrase o campionato autonómico.
As entidades animalistas fixeron un chamamento a través das redes sociais para pedir voluntarios e boicotear así o campionato. Free Fox e Libera! non dubidaron tamén en iniciar distintas peticións a través de change.org solicitando o cesamento deste tipo de certames.
Tamén o Sindicato Labrego Galego e a Federación Rural Galega mostraron o seu desacordo coa Xunta e reclaman a paralización do campionato para evitar que empeoren os danos nas súas colleitas. Estas entidades indican que están afectadas máis de 2.000 hectáreas e os danos económicos son moi cuantiosos.
