Este domingo, “Domingo Lambedoiro”, Chantada vístese de entroido. A partir das 11:30 h. terá lugar un percorrido de varios entroidos tradicionais convidados tendo como anfitrión ao Entroido Ribeirao chantadino.
A saída terá lugar na Praza Santa Ana e en caso de choiva as representacións trasladaranse ao Auditorio Municipal.
Os entroidos convidados que estarán presentes son: os Fulións Rurais de Viana do Bolo, o Oso de Salcedo, Peliqueiros e Parranfóns de Campobecerros, Troiteiros de Bande, Entroido de Samede, Felos e madamas de Esgos, Galos da Mezquita e Perriñas de Ribadetea.
Pola tarde, ás 16:00 h., Santiago de Arriba será o escenario onde o Entroido Ribeirao recibirá aos entroidos convidados. Unha tarde que se presenta moi atractiva para gozar da interacción de todas estas máscaras tradicionais cos Volantes, os Maragatos e Os Mecos de Santiago de Arriba.
Martes de Entroido en Chantada
Despois dunha reunión entre organización e participantes doutras ocasións, este ano o martes de Entroido na vila pasará a celebrarse o sábado 22 de febreiro. Será a partir das 17:00 h. co percorrido de sempre polas rúas do concello dende Domus Vi ata a Praza de Galicia. Así, os integrantes das comparsas poderán gozar da celebración durante a fin de semana e tamén dos domingo e martes do Entroido Ribeirao sen coincidir ambos acontecementos.
O Concello de Chantada convida á participación e ofrece diferentes premios. Cada comparsa de máis de 10 participantes levará 250 euros, e en canto ás mellores, os premios -categorías separadas de adultos e infantís- son os seguintes: 450 euros para a primeira, 350 para a segunda e 200 para a terceira.
A data límite para inscribirse é o mércores 19 de febreiro e o lugar onde se debe realizar é o Rexistro do Concello. As bases para a participación están na Casa da Cultura.
