O alcalde Taboada, Ramiro Moure, confía en que a paralización da produción de lácteos de Casa Macán sexa “provisional”, despois de que a Consellería de Sanidade ordenase a retirada do mercado de todos os seus produtos por unha alerta sanitaria debido á falta de “limpeza”.

Respecto diso, prevé que esta situación teña unha “repercusión importante” sobre esta queixería do sur de Lugo, aínda que descoñece o impacto “real” que poida ter.

“VAI SER COMPLICADO LEVANTARSE”

O rexedor sinala que a empresa presentaba “unha actividade moi baixa porque foi cedendo e perdendo cota de mercado”. De feito, na actualidade conta cun cadro de persoal de “10 traballadores”, pero “chegou a ter ata 50”.

“Hoxe a repercusión é máis pequena que se isto mesmo se producise hai cinco anos”, reflexiona Moure. Iso si, aínda que sexa “unha parada provisional”, entende que “vai ser complicado levantarse”.