As boas temperaturas acompañaron os desfiles de entroido desta fin de semana. En Quiroga foron moitos os asistentes que acudían disfrazados, tal e como era o caso do alcalde, Julio Álvarez, a senadora quiroguesa Rosa Arza e algúns concelleiros.

Cada comparsa tentou acaparar as miradas do xurado, integrado por un membro de cada comparsa participante, que valoraría especialmente a orixinalidade dos disfraces, a coreografía, a escenografía, a elaboración do vestiario e a elaboración da carroza.

O primeiro premio dotado de 600 euros recaeu na comparsa Campo da Feira , o segundo premio de 300 euros foi para a comparsa os quirogüinos do Xeoparque e un terceiro premio de 200 euros levouno a comparsa Villarecicla. O resto das comparsas participantes recibirá 100€. No caso de disfraces individuais estableceuse un único premio ao mellor disfrace de 60 €.

A xornada de Entroido remataba con un  baile de disfraces amenizado pola charanga BB+. Ao remate, invitación a chocolate con churros para todas as persoas que se achegaban a gozar da festa.

O entroido en Quiroga segue este luns con Festa Infantil, na Discoteca Yoya, a partir das cinco da tarde; e o Centro Social organiza o martes, día 25, a partir das seis da tarde, unha cita para os socios e socias, na que haberá doces típicos destas festas con sangría e baile de disfraces.