Un incendio que se produciu na noite do domingo para o luns, 24 de febreiro, deixou practicamente reducida a cinzas unha vivenda unifamiliar no lugar de Barreiro, no municipio lucense de Pantón. Non houbo que lamentar danos persoais, dado que os propietarios non estaban dentro da casa cando comezou o lume.

O alcalde da localidade, José Luis Álvarez, precisou que a casa é propiedade dunha familia que vive en Vigo e que se achega normalmente as fins de semana. Tamén explicou que o lume comezou sobre as 21:00 horas, aparentemente por causa dun curtocircuíto, e aínda que os medios de emerxencias lograron sufocar as chamas, o incendio volveu reavivarse ao redor das 06:30 horas desta mañá, polo que a vivenda “quedou totalmente destruída”.