A denuncia procedeu do sindicato CIG, que cifra o número de persoas despedidas nas oficinas de Chantada, no último mes, nun total de oito, cinco delas “coa escusa” do descenso de reservas pola crise do COVID-19.
Fontes do grupo hostaleiro recoñecen a Europa Press que se prescindiu de “algúns postos de traballo” pero “nun número moi inferior” ao indicado pola central nacionalista, á que acusan de “ter unha fixación” coa empresa. Así, sinalan que os traballadores dos que se prescindiu son aqueles que “se viron máis afectados” polas cancelacións e que “todos os contratos extinguidos eran eventuais ou a tempo parcial”.
“Ningún dos traballadores tiñan ningunha vinculación con organizacións sindicais no momento de extinción”, engaden fontes da dirección de Hotusa interpeladas por Europa Press. “Esta decisión foi motivada única e exclusivamente coa finalidade de asegurar, ante a situación actual, os restantes postos de traballo do departamento afectado. Neste sentido, o proceso de propagación do virus e as consecuencias a el asociadas, en canto á evolución das reservas, marcará a necesidade de adoptar ou non, outras medidas”, engaden.
DENUNCIA DA CIG
Para a CIG, Hotusa emprega a crise do COVID-19 como “unha escusa” que “aproveita” para “aplicar despedimentos moi seletivos, xa que afectan a persoas, que a empresa vincula coa CIG”. “Hotusa pretende dar un paso máis nas súas prácticas represivas revestindo de obxectividade uns despedimentos que claramente teñen a finalidade de desfacerse dos traballadores que lle resultan máis molestos, e dar un escarmento ao resto de compañeiros”, remarca a central nacionalista nun comunicado.
