Tal como estaba anunciado, o Exército chegou a Monforte, e dende a mañá xa vixilan diferentes puntos da cidade con chaleques fluorescentes por enriba dos seus uniformes militares. Estanse deixando ver por diferentes puntos da cidade como o centro, a zona da Compañía, onde o Gadis, no paso a nivel de Roberto Baamonde, no barrio da Estación, nas rotondas da Ronda de María Casas Baamonde e onde o Hospital Comarcal.
Chaman a atención e impoñen respecto, dada a situación insólita, e nalgúns casos ata provocan a retranca, como un comentario que correu por grupos de whatsapp “que vaian ás viñas que fan máis servizo”. Nalgún caso paran algúns vehículos como rutina de control.
Moitas e moitos monfortinos pregúntanse se para unha poboación que non chega a 19.000 habitantes fai falta este desgregue habendo xa cuarteis de Policía Nacional e de Garda Civil e non tendo, polo momento, unha situación crítica ou difícil de cumprimento do confinamento.
