O Grupo Municipal do PP de Sarria, que dirixe José Antonio García, e a presidenta provincial, Elena Candia, analizaron este domingo a situación política do municipio nunha reunión de traballo telemática. Os populares locais expuxeron a Candia “a escasa vontade política do alcalde”. “Por non facer, nin tan sequera repartiu máscaras”, advertiu García; de aí que este Grupo Municipal solicitase un pleno extraordinario para pedir explicacións ao goberno local de tal inacción.
Lembran os populares que teñen presentado ao concello unha proposta con 30 medidas para axudar a veciños, pemes e autonómos a paliar os efectos da Covid-19, pero non foi tida en conta. Pola contra, o rexedor “aproveitou o estado de alarma para avanzar en contratos de privatización do servizo eléctrico e operacións inmobiliarias contrarias á economía local. Trátase dun megacontrato a favor dunha empresa por valor de preto de 14 millóns e que van pagar os veciños de Sarria ata o 2040”.
Os populares abordaron tamén a situación do expediente que permitirá a execución da primeira fase para o desdobramento do corredor; “Convertelo en autovía será un antes e un despois na vertebración do municipio e da comarca”, apuntou tamén Elena Candia.
