A xuíza arquiva a causa que seguía contra José Manuel Franco, delegado do Goberno de Madrid, por un presunto delito de prevaricación administrativa por permitir concentracións multitudinarias. A maxistrada tomou esta decisión tras escoitar este mércores a Franco, que acudiu a declarar en calidade de investigado, e a un total de 18 testemuñas que compareceron despois, entre eles o secretario xeral da delegación do Goberno, Fernando Talavera; sete funcionarios do organismo e 10 promotores de manifestacións aos que chamaron para pedir que cancelasen as súas concentracións.
A iso súmase a batería de dilixencias de investigación que ordenou desde o 23 de marzo, cando acordou admitir a trámite a denuncia dun particular, como os informes ao médico forense adscrito ao xulgado e á Garda Civil.
A xuíza conclúe no auto que o investigado, entre o 5 e o 14 de marzo de 2020 “non tivo coñecemento certo, obxectivo e técnico do risco que para a saúde das persoas entrañaba a realización de manifestacións e concentracións”.
Así mesmo, sinala que Franco “non recibiu comunicación ou instrución sanitaria sobre este particular e tampouco a solicitou de oficio de ningunha autoridade competente no ámbito sanitario”. Engade que tampouco “ningunha persoa física ou xurídica, pública ou privada, instou ó delegado do Goberno en Madrid a que prohibise ou restrinxise dalgunha forma a celebración de concentracións ou manifestacións por razón da covid19”.
