A Mariña conta no seu primeiro día de peche, segundo datos da Consellería de Sanidade, con 119 casos activos de Covid19. Segundo o reconto das probas realizadas nesta mesma mañá confírmanse 22 casos máis e déronse 9 altas o que fai un total de 119 infectados.
Segundo expuxo o xerente da área sanitaria de Lugo, Cervo e Monforte, Ramón Ares, os “22 casos novos” detectados teñen todos “relación directa” co brote, polo que o Sergas seguirá “coa estratexia” da “busca activa de casos e de análise dos contactos, o máis precozmente posible, para cortar a cadea de transmisión”.
Evasión de responsabilidades da Xunta
A normativa que regula o peche da Mariña, decisión tomada pola Xunta de Galicia tras aumentar o número de positivos de coronavirus na bisbarra ata alcanzar os 99 casos, establece que “a vixilancia, inspección e control do cumprimento das medidas de prevención que se recollen nesta orde, e a garantía dos dereitos e deberes sanitarios, corresponderán aos Concellos”. O Executivo autonómico responsabiliza así do cumprimento da normativa aos gobernos locais, que acusaron ao Goberno galego de “evasión de responsabilidades”. Toda a información no Xornal da Mariña.
