O grupo municipal Espertamonforte! comunica que apoiará incondicionalmente todas as accións promovidas pola plataforma “Salvemos o Malecón” dirixidas á paralización do proxecto de construción dunha nova ponte de ferro no paseo de Malecón.

Espertamonforte! lembra que xa defenderan incluso antes de concurrir ás súas primeiras eleccións municipais no ano 2015, a necesidade de peonalizar a Ponte Vella de Monforte, e rexeitan a necesidade de construción dunha nova ponte.

Aseguran que nunca consideraron precisa a construción da ponte impulsada polo alcalde, José Tomé, no Malecón, “que estragaría completamente a contorna do paseo do Cabe,”.

Segundo Espertamonforte! querer sacar adiante a ponte de ferro do Malecón, neste momento de crise sociosanitaria e económica “aínda ten menos sentidiño. Como se plantexa neste momento adicar unha cantidade de 2 millóns de euros a este proxecto claramente prescindible? podendo adicar esos orzamentos a outras partidas de maior necesidade, como emerxencia social o recuperación económica.”