A Consellería de Política Social informa dun segundo contaxio activo por coronavirus entre o persoal das residencias de maiores de Galicia, concretamente do xeriátrico de Paradela, que se suma ao dun empregado de San Bartolomeu (Xove).

O pasado día 22 foi o único no que a Xunta deu oficialmente libres da COVID-19 ás residencias en Galicia tras recibir o alta unha traballadora de Burela, pois ás 24 horas deu conta do citado contaxio en Xove. O saldo mortal da pandemia nestes centros é de 274 persoas falecidas.

A finais de abril, os contaxios activos nos xeriátricos pasaron con folgura o milleiro de casos e a Xunta decidiu intervir a xestión en tres deles: DomusVi Cangas, DomusVi Barreiro (Vigo) e O Barco.