En Sarria temos este sábado 5 de setembro a partires das 18:00 h. un pasarrúas que animará aos máis pequenos/as da casa a cargo da Compañía de animación Troula. Trátase de “Hakuna Matata”, unha posta en escena moi divertida na que un zancudo terá que controlar a unha xirafa tola, un rinoceronte desbocado, un elefante que dá voltas… O percorrido arrincará da Ponte Ribeira e rematará na Praza da Vila pasando antes polo Malecón, a Rúa Calvo Sotelo e Catro Camiños.
Dende o Concello lembran que se deben gardar as medidas de seguridade, levar máscara e respectar a distancia física. Tamén, como non, evitar aglomeracións e non formar grupos de máis de dez persoas.
Pensando xa nun público adulto, a Concellería de Cultura de Sarria convida o domingo, 6 de setembro, ás 21:00 horas, a gozar da obra “Sénior” na Praza da Vila. Un espectáculo cómico sobre a crise dos 50, cos coñecidos actores Luis Iglesia e Marcos Orsi como protagonistas.
A organización lembra que non é preciso reservar entrada, pero o acceso será por rigoroso orde e ata completar o aforo.
Este sábado 5 de setembro volve a música a Sober. A Praza do Pulpo será, a partir das 22:30 h., o escenario dun concerto no que a combinación de humor e música será a protagonista. A escena o dúo Carta de Ajuste, unha formación luguesa composta por David Taboada e Iván Valdés. Dous músicos insensatos e moi dados á troula e á parodia influenciados por agrupacións musicais de corte cómico como Les Luthiers, Académica Palanca ou Los Gandules.
Este dúo acústico foi evolucionando ata imprimirlle ao seu espectáculo un carácter máis teatral, humorístico e desenfadado que os está levando a adaptar no seu repertorio todo tipo de xéneros musicais, dende a rumba ou a música disco ata o funk, a música tradicional ou a lambada. Versións e risas aseguradas co seu espectáculo “O mellor e o peor dos 80 e 90 en concerto”.
No Círculo do Saviñao, seguindo coa súa programación de concertos, o sábado 5 ás 20:00 h. chega a Escairón o dúo Soul & Roll, formado por Miguel Araújo á guitarra e Tamara Pérez como voz solista. Interpretarán versións de grupos míticos como Queen, Creedence Clearwater Revival, Jackson Five, Police, U2, Nirvana o Guns and Roses, Bruno Mars o Bon Jovi pero tamén un amplo repertorio de clásicos do pop e do rock español.
