O mes que vimos de superar remata cun total de 3.857 parados/as nas comarcas da zona sur de Lugo: Sarria, Chantada, Lemos e Quiroga. A Secretaría de acción sindical de CC.OO. Lugo facilita os datos e amosa o seu descontento, informando ademais que 231 mozos e mozas menores de 25 anos están sen traballo neste territorio. A comarca de Lemos é a que peor números presenta neste apartado cun total de 99 mozos/as, 80 deles só en Monforte.
Por comarcas, Sarria remata setembro con 1.206 desempregados/as (+23), Quiroga suma 273 (+13), Lemos queda con 1.695 (+4) e Chantada, única que perde parados/as, acaba con 683 (-3).
Os números por concellos
Comarca de Lemos: Bóveda queda con 57 parados/as tras reducir o seu número en 4, Monforte de Lemos 1.196 (+20), Pantón 111 (-4), A Pobra do Brollón 62 (-10), O Saviñao queda con 162 e non sofre variación algunha e Sober 107 (+2).
Comarca de Chantada: Carballedo 62 (-10), Taboada 121 (+9) e Chantada 490 (-4).
Comarca de Sarria: O Incio 42 (-7), Láncara 125 (+2), Paradela 44 (+5), O Páramo 44 (+7), Samos 35 (+2), Sarria 891 (+15) e Triacastela 25 (-1).
Comarca de Quiroga: Folgoso do Courel 49 (+5), Ribas de Sil 48 (+4) e Quiroga 176 (+4).
A Secretaría de acción sindical de CC.OO. Lugo entende que é o momento de cambiar o modelo produtivo tras constatar que o sector servizos está esgotado, sendo o que máis desempregados/as acumula en todas e cada unha das comarcas -máis do 65,6% do total-. Neste senso avogan por recorrer ao sector da construción e da obra pública para tirar do emprego esperando que “o Goberno Central e o Ministerio, se lembren das obras prometidas, A-76 –Ourense-Ponferrada-, Autoestrada Nadela-Sarria-Monforte e A-72 -Monforte-Chantada-“.
