Os socialistas sinalan que en “Currelos hai un centro de atención primaria, que conta cun médico e un enfermeiro, e no que tamén traballaba unha persoa contratada polo Concello que realizaba labores de limpeza e de conserxe ata o 30 de setembro. Pero por mor da xubilización deste empregado, actualmente a persoa que a substitúe só realiza labores de limpeza, polo tanto o centro de Currelos esta desatendido, xa que ninguén colle o teléfono para atender as consultas, nin dan cita  aos pacientes e só se limitan a derivar ao centro de Escairón”. 

Dende o Grupo Socialista do Saviñao, diante desta situación, que califican de abandono que sofren as veciñas e veciños de Currelos, demandan ao Concello e ao SERGAS, que contraten persoal para facilitar os trámites e consultas dos pacientes da zona Norte. Reclaman tamén que se garanta a continuidade do médico de Currelos, “tanto pola saúde dos pacientes, como pola economía da zona norte do Concello, xa que o peche conlevaría unha situación de abandono desta zona, como por exemplo o peche da farmacia”.