O Concello de O Saviñao mellora o parque infantil de Currelos optimizando os recursos municipais. O rexedor indica que “este parque estaba en mal estado e decidimos reparalo para o seu uso optimizando custos: organizando o traballo das brigadas municipais e co obradoiro de emprego que financia a Xunta, o Ricra III”. 

Foron dúas das tres especialidades deste obradoiro as que fixeron posible a renovación do peche perimetral: a de moble e traballos de carpintaría e a de aplicación de vernices e lacas. Dentro deste obradoiro tamén se elaborou outro tipo de mobiliario urbano, como varandas de madeira ou cubrecolectores; ademais de estanterías, armarios ou bancos.

Traballos de poda

As brigadas municipais do Saviñao continúan cos traballos de poda das árbores dos espazos verdes do Concello. Despois das de Escairón, están xa podadas tamén as árbores de Currelos.