Este novo servizo, cofinanciado pola Xunta de Galicia a través do programa O Teu Xacobeo, que comezará a usarse cando a situación sanitaria o permita,  ven a complementar o traballo de ampliación dos dous museos quirogueses. 

O Museo Xeolóxico abriu de novo as portas tras a súa ampliación no pasado mes de agosto. Os visitantes poderán agora ver e escoitar todo o que recolle referente á formación xeolóxica, co pregamento de Campolola-Leixazós; á historia paleontolóxica, cun importante rexistro fósil; aos cambios climáticos, coas pegadas da última glaciación; ás primeiras ocupacións humanas, coa réplica de Elba, a muller máis antiga atopada na zona; e á minería antiga e recente.

Na fachada deste edificio están a traballar os participantes no Obradoiro de Emprego SilLor. Levantaron dúas columnas para a construción dun soportal na súa entrada. As columnas de cemento revestido de pedra de canteiría -acorde coa fachada do museo-, suxeitan unha estrutura de madeira que sosterá un tellado de cristal.

En canto ao Museo Etnográfico, que tamén dispón do servizo de autoguía, ten en proxecto a súa ampliación, que previsiblemente comezará co inicio do vindeiro ano e que permitirá sumar máis pezas a esta gran exposición do noso pasado material. Nestes momentos conta con varias salas: a lareira, que representa varias dependencias dunha vivenda; a fragua, que recrea as ferrerías; o pendello, que recolle un bo número de apeiros de labranza; o aceite, cunha recreación dun muíño; e a adega, na que está presente o mundo do viño. A serra, o tear, a lousa e as castañas tamén forman parte deste museo. Máis tarde acolleu parte das maquetas das casas de pedra elaboradas para a película galega de animación “O Apóstolo”. Recentemente ampliouse a parte dedicada ao mel coa réplica de parte dunha alvariza e abriuse a sala dedicada  á escola. A última incorporación foi a sala dedicada á imprenta.